Зайсан толгой биш “шааран” толгой жуулчдыг угтаж байна

Монгол улсын эдийн засгийн хөгжилд аялал жуулчлал чухар үүрэгтэй гэдгийг хаа хаанаа мэдэж байгаа. Тиймдээ ч аялал жуулчлалыг хөгжүүлэх, үүнд шаардлагатай бүтээн байгуулалтуудыг хийж байгаа тод жишээ Зайсан орчим болов уу гэж харж байна. “Зайсан хилл” , “Зайсан скүэйр” гээд тухайн орчимд өндөр шилэн барилгууд юу юугүй сүндэрлээд ирлээ. Харамсалтай нь Зайсан толгойн орой хэсэг бол бүр утгаа алдчихжээ. Өнөөх хүүхдийн баяр, улсын баяраар хаа сайгүй хөглөрдөг хятад тоглоом, дардас, шаар хагалдаг байдлыг одоо нэмэлтээр Зайсан толгой дээр гараад харж болох нь. Маш эмгэнэлтэй, ичмээр дүр зураг.

Ядаж түүхэн зургийн үзэсгэлэн, монгол бэлэг дурсгалын зүйлс худалдаалаад зогсож болоогүй юм байх даа. Үүнд анхаарал хандуулах газар нь юу юм бол !!!

Зорьж очсон жуулчид шаар хагалж, тоос тортог болсон хэдэн чихмэл тоглоомоор нүдээ баясгаад буцах нь. Бас болоогүй ээ шонхор шувуутай зургаа даруулвал 3000 төгрөг гэдэг үйлчилгээ ч Зайсан толгой дээр нэвтэрчихсэн байна лээ.

Энэ бүхнээс үзэхэд, төд удахгүй Зайсан толгой “мини тоглоомын талбай” болж, жуулчид “шааран толгой” гэж нэрийдэх нь.