Дональд Трамп ба Ким Кардашян

Америкийн реалити шоуны од Ким Кардашян өчигдөр Цагаан ордонд ерөнхийлөгч Дональд Трампад бараалхан хар тамхины хэргээр бүх насаар хоригдох ял авсан 63 настай эмэгтэйг өршөөлд хамруулах асуудлаар ярилцжээ.

Кардашян өчигдөр үдээс хойш Цагаан ордны баруун жигүүрт зочилж, цаг орчим хугацаанд ерөнхийлөгчтэй ярилцсан байна. Мөн ерөнхийлөгчийн хүргэн, хууль зүйн асуудлаар зөвлөж байгаа Жаред Кушнертай уулзсан гэнэ.

Сүүлд Трамп энэ уулзалтын тухай твиттер хуудсандаа “Ким Кардашянтай уулзаж, шоронгийн шинэчлэл, ялын бодлогын талаар ярилцлаа” гэж бичжээ.

Кардашян нь анх удаа хар тамхины хэрэгт орооцолдож бүх насаар хоригдох ял авсан Алис Мэри Жонсон гэдэг эмэгтэйн ялыг хөнгөрүүлэх зорилготой олон нийтийн ажлыг эхлүүлээд байгаа юм. Өнгөрсөн сард Кардашяны нөхөр, рэппер Кэни Уэст сошиал сүлжээнд Дональд Трампыг магтсан мэдэгдэл бичиж байв.

Тухайн үед Трамп түүнд талархал илэрхийлж, Грэммийн шагналт дуучныг хариу магтаж байжээ.