Ардын уран зохиолч Ц.Дамдинсүрэнгийн мэндэлсний 110 жилийн ойд зориулсан хурал болно

Монгол Улсын төрийн гурван удаагийн шагналт, анхны ардын уран зохиолч, академич Ц.Дамдинсүрэнгийн мэндэлсний 110 жилийн ой энэ онд тохионо. Их эрдэмтний ойд зориулсан олон улсын эрдэм шинжилгээний бага хурал өнөөдөр 09.00-18.00 цагт Улаанбаатар зочид буудалд болох юм.

Уг хурлын үндсэн илтгэлийг  "XX  зуунд Монгол Улсад заяасан соён гэгээрүүлэгч, шинжлэх ухааны зүтгэлтэн, ардын уран зохиолч" сэдвээр ШУА-ийн Хэл зохиолын хүрээлэнгийн захирал, доктор, профессор Г.Билгүүдэй  тавьж хэлэлцүүлнэ. Мөн Академич Д.Цэрэнсодном "Академич Ц.Дамдинсүрэнгийн "Монголын нууц товчоо"-ны орчин цагийн монгол хэлний орчуулгын онцлог" сэдвээр илтгэл хэлэлцүүлэхээр бэлтгэжээ.  

Энэхүү олон улсын эрдэм шинжилгээний бага  хуралд академич Ц.Дамдинсүрэнгийн охин, ОХУ-ын Москвагийн хүмүүнлэгийн их сургуулийн доктор Анна Цендина Дамдинова оролцох юм.

Мөн ОХУ, БНХАУ, Япон улсаас эрдэмтэд судлаачид урилгаар оролцох ажээ. Хурлаар их эрдэмтний хэл шинжлэл, утга зохиол судлал, орчуулга зэрэг олон салбарт үлдээсэн өвийг тал бүрээс нь судалсан сонирхолтой илтгэлүүдийг тавьж хэлэлцүүлнэ.