Москвагийн гудамжинд машинтай хүн явган зорчигчдыг мөргөж бэртээжээ

Өчигдөр буюу Бямба гарагт Москва хотын хөл хөдөлгөөн ихтэй гудамжинд нэгэн такси явган зорчигчид руу дайрч, найман хүнийг мөргөж гэмтээсэн байна.

Улаан талбайгаас километр хүрэхгүй зайнд болсон энэ хэргийг санаатай үйлдсэн байж болзошгүй гэж сэжиглэж байгаа гэнэ.

Таксины жолооч Ильинка гудамжинд гэнэт явган хүний зам руу нэвтэрч, хурдаа нэмэн хэдэн метр давхисны эцэст төмөр хашлага мөргөөд зогсжээ.

Жолооч нь болох Киргиз үндэстэн хэргийн газраас зугтахыг оролдоод баригдсан байна. Амиа алдсан хүн байхгүй, харин ДАШТ үзэхээр ирсэн Мексикийн иргэн хоёр эмэгтэй бэртжээ.

Оросын эрх баригчид уг хэргийг терроризмтай холбоогүй, энгийн осол байсан гэж тайлбарлаж байна.Тодруулбал жолооч нь хяналтаа алдсанаас гарсан хэрэг гэж тайлбарлажээ.

Хөлбөмбөгийн ДАШТ зохион байгуулж байгаа ОХУ-д хамгаалалт, аюулгүй байдлыг дээд зэргээр ханган ажиллаж байгаа. Зарим хотуудад тэмцээн болох өдөр тээврийн хэрэгслийг гол гудамж талбайд хориглож, бүх нийтийн амралтын өдөр болгож байна.

Эх сурвалж: The Guardian