ХҮН ХУДАЛДААЛАХААС ХҮҮХДИЙГ ХАМГААЛАХ ТӨСӨЛ ХЭРЭГЖҮҮЛЖ БАЙНА

Нийслэлийн ГБХЗХГ-тай хамтран урьдчилан сэргийлэх зорилтын хүрээнд Гэрээр айлчлах хөтөлбөрийг нийслэлийн 5 дүүрэгт хэрэгжүүлээд байгаа бөгөөд бэлтгэгдсэн гэрээр айлчлагч сайн дурынханд чиглэсэн Хүүхэд хамгааллын сургалтыг 4 сарын 4-6-ны өдрүүдэд дүүрэг тус бүрээр зохион байгууллаа. Сургалтад нийслэлийн Баянзүрх, Баянгол, Чингэлтэй, Сүхбаатар, Сонгинохайрхан дүүргүүдэд гэрээр айлчлах хөтөлбөрөөр бэлтгэгдсэн гэрээр айлчлагч, сайн дурынхан, хэрэгжүүлэгч байгууллагуудын төлөөлөл нийт 221 хүн хамрагдлаа.

Сургалтаар хүүхэд хамгааллын тухай хууль эрх зүйн орчин, хүүхдийн эрхийн зөрчлийг таних, төрийн үйлчилгээнд хэрхэн холбон зуучлах, өрхүүдтэй хөгжлийн төлөвлөгөөг хийх талаар нэгдсэн ойлголттой болсон.

Гэрээр айлчлах хөтөлбөрийг Нийслэлийн Баянзүрх дүүрэгт “Монголын сайн дурынхны төв” ТББ, Баянгол дүүрэгт Монголын Скаутын холбоо ТББ, Чингэлтэй дүүрэгт Боловсрол ирээдүйн хөгжлийн гарц ТББ, Сүхбаатар дүүрэгт Өсвөр үеийнхний хөгжлийн төв ТББ, Сонгинохайрхан дүүрэгт Лантуун дохио ТББ-ууд нийт 220 гэрээр айлчлагч, сайн дурынхнаар дамжуулан хэрэгжүүлж байна.