ОРОН ДАЯАН НЭГЭН ЦАГТ ЭХЛЭХ НОМЫН БАЯР БОЛОХОД ГАНЦХАН ХОНОГ ҮЛДЛЭЭ

Нийтээр тэмдэглэх баярын болон тэмдэглэлт өдрүүдийн тухай хуульд 2021 онд нэмэлт өөрчлөлт орсноор “Үндэсний бичиг соёл, номын өдрүүд”-ийг 05 болон 09 дүгээр сарын гурав дахь долоо хоногийн Бямба, Ням гаригт тэмдэглэх болсон билээ.

Энэ жилийн хувьд энэ сарын 16-18-ны өдрүүдэд Чингисийн талбайд “Илүү их уншъя” уриатайгаа зохион байгуулагдах юм. 32 дахь удаагийн энэхүү Номын баярыг хэмжээ Монгол Улсын Их Хурлын дарга Гомбожавын Занданшатарын ивээл дор Соёлын яам, Соёл урлагийн газар, Нийслэлийн Засаг даргын тамгын газар, Нийслэлийн соёл урлагийн газар, Номын соёлт ертөнц ТББ хамтран зохион байгуулж байна.

“Үндэсний бичиг соёл, номын өдрүүд-2022” арга хэмжээний нээлтийн ёслол 09 дүгээр сарын 16-нд 13.00 цагт Д.Сүхбаатарын талбайд болох бөгөөд 21 аймгийн төв талбайд нэгэн зэрэг эхэлдгээрээ онцлог юм.

Ийнхүү үндэсний бичиг соёл, номыг сурталчлах, ном хэвлэлийн салбарынхны хамтын ажиллагааг дэмжих, бүх нийтийн уншлагыг дэмжих соёлын олон талт арга хэмжээ 3 өдрийн турш зохион байгуулагдах нь ээ.

Тус арга хэмжээ нь 2022 оноос Нийтээр тэмдэглэх баярын болон тэмдэглэлт өдрүүдийн тухай хуульд заасны дагуу “Үндэсний бичиг соёл, номын өдрүүд” хэмээн өргөжин хүрээгээ тэлж номыг бүтээдэг, дээдлэн хүндэлдэг, номд дуртай хэн бүхний хүсэн хүлээдэг БАЯР болж байна. 

Сонирхуулахад, 1950 оноос “Хуучин номын худалдаа”, 1955 оноос “Хүүхдийн номын зах”, 1990 оноос ”Номын баяр”, “Номын үзэсгэлэн’, 1999 оноос “Номын яармаг”, 2000 оноос “Бичиг соёлын хишиг өдөр”, 2012 оноос “Номын баярын өдөр” нэртэйгээр уламжлал болгон зохион байгуулагдсаар иржээ.

Энэхүү 32 дахь удаагийн номын баярт монголын нийт ард иргэд, хүүхэд багачууд, оюутан залуус, гэр бүл, багш, сурган хүмүүжүүлэгчид, байгууллага, хамт олныг өргөнөөр оролцохыг уриалж байна.