ОРХОН АЙМАГТ ҮЙЛ АЖИЛЛАГАА ЭРХЭЛЖ БУЙ ЖИЖИГ ДУНД ҮЙЛДВЭРҮҮДТЭЙ ТАНИЛЦЛАА

“Эрдэнэт үйлдвэр” ТӨҮГ-ын Ерөнхий захирал Х.Бадамсүрэн, УИХ-ын гишүүн Д.Батлут, Н.Алтанхуяг нар Орхон аймагт үйлдвэрлэл эрхэлж байгаа жижиг дунд үйлдвэрүүдтэй танилцаж, бизнес эрхлэгчидтэй уулзлаа.

Ган бөөрөнцөг, бетон зуурмаг, будаг, хор саармагжуулах бүтээгдэхүүн, хүнс үйлдвэрлэгч ААН-үүдийн зүгээс Эрдэнэт үйлдвэрт бараа бүтээгдэхүүнээ нийлүүлэх, хамтран ажиллах талаар санал хүсэлтээ илэрхийллээ.

Эрдэнэт үйлдвэр 2022 оныг Их бүтээн байгуулалтын жил болгон зарласан. Техник технологийн шинэчлэл, томоохон бүтээн байгуулалт, төсөл хөтөлбөрүүдийг уурхайчид хэрэгжүүлнэ.

Шинэ сэргэлтийн бодлогын хүрээнд аж үйлдвэрийн сэргэлтийг бий болгох, нэмүү өртөг шингэсэн эцсийн бүтээгдэхүүн боловсруулах үйлдвэрүүдийг үе шаттайгаар байгуулах, төрөөс бодлогоор дэмжихээр болсон.

Үүнд Орхон аймгийн аж ахуйн нэгж, компаниудын оролцоо, чадавхи, тендерийн хуулийн дагуу 100 хувь ил тод байх зэргийг судлахаар үйл ажиллагаатай нь танилцаж байгаагаа Ерөнхий захирал Х.Бадамсүрэн онцоллоо.

“Эрдэнэт үйлдвэр” ТӨҮГ нь 2020 онд Орхон аймгийн 205 ААН-тэй 70.4 тэрбум төгрөгийн 493 гэрээ байгуулсан бол 2021 онд Орхон аймгийн 153 ААН-тэй 61.4 тэрбум төгрөгийн 337 гэрээ байгуулан ажиллаж, орон нутгийн үйлдвэрлэл эрхлэгчдээ дэмжсэн байна.