ТӨРИЙН БАНКНЫХАН ТАТВАР ТӨЛӨГЧДИЙН МӨНГӨӨР ТҮРЭЭСЭЭ ТӨЛЖ, ХАРИЛЦАГЧДЫНХАА СЭТГЭЛ ХАНАМЖИЙГ ҮНЭЛҮҮЛЖЭЭ

Төрийн болоод төсвийн мөнгө гэж байдаггүй гэдэг. Тэгвэл Төрийн банканд ч ялгаагүй өөрийн МӨНГӨ гэж байхгүй. Харин татвар төлөгчдийн мөнгө бол бий. Харамсалтай нь Төрийн өмчит ганц арилжааны банк маань тэрхүү татвар төлөгчдийн мөнгийг хэмнэдэггүй бололтой. Тус банк Монгол орон даяар 500 гаруй салбар нэгжтэй гэдэг. Тэдгээрийнх нь ихэнх нь түрээсийн байранд үйл ажиллагаа явуулдаг бөгөөд сар бүр түрээс төлдөг.

Мэдээж бусад арилжааны банкуудтай өрсөлдөхийн тулд олны хөлийн, өнгөтэй, өөдтэй газрыг сонгох нь гарцаагүй. Гэхдээ тендер зарлалгүйгээр сонголтоо хийдэг нь тун хачирхалтай, анхаарал татах сэдэв. Учир нь Төрийн банк салбаруудынхаа офиссын түрээсэнд сар бүр 5-13 сая төгрөг төлдөг ажээ. Энэ тухайгаа Шилэн дансандаа жирийтэл эгнүүлээд биччихсэн байгааг бэлхнээ харж болно.

Хэмнэе гэвэл ганцаасаа гэж үг бий. Харамсалтай нь Төрийн банкныханд тийм сэтгэл алга. Ингээд ч зогсохгүй тус банкныхан өнгөрсөн сард Харилцагчдын сэтгэл ханамжийн судалгаа хийлгэсэн байна. Үүнийгээ 35 сая төгрөгөөр хийлгэжээ. Уг нь харилцагчдын сэтгэл ханамжийн судалгааг өөрсдийн банкны тусгай дугаарын үйлчилгээ болон интернэт банкныхаа тусламжтайгаар хийчих боломжтой ажил байлтай. Тэгтэл ганц судалгаанд 35 сая төгрөг зарлагадаж байгаа нь татвар төлөгчдийн мөнгөнд хяналт байдаггүйг л харуулав бололтой.