ШУУРХАЙ: Галт тэргэнд дайруулсан охины биеийн байдал хүнд байна

Улаанбаатар хот, Баянзүрх дүүрэг – Төмөр замын 407-р км:

Өнгөрсөн мягмар гарагт 14:42 цагт 15 настай охин сэлгээний 4147-р галт тэрэгний урдуур албаар гүйж дайруулсан харамсалтай хэрэг гарчээ. Осол гарсан даруйд төмөр зам дах цагдаагийн газрын ажилчид болон эмнэлгийн яаралтай тусламж ослын газарт түргэн шуурхай ирж ажиллажээ.

Уг ослоос хойш нийт 24 цагийн хугацаанд охинд гурван удаагийн мэс засал хийгдсэн. Одоогоор ГССҮТ-ийн сэхээн амьдруулах тасагт хэвтэн эмчлүүлж байгаа ба биеийн байдал маш хүнд байдалтай байна.

Тодруулбал, охины зүүн гар тасарч, дайруулах үед нүүрэн хэсэгтээ хүнд бэртэл авч, нүдний зовхи унжиж, хэвлийн шингэнтэй, бөөрөнд цус хуралдсан зэрэг асуудлууд тулгарч буй учир маш хүнд хагалгаануудад ороод байгаа талаар эх сурвалж мэдээллээ. Биеийн байдал дээрдэхгүй энэ мэтээрээ хүндэрвэл гадагшаа явж эмчилгээ хийлгэх шаардлага тулгараад байгаа аж.

Энэ мэт сүүлийн үед хүүхэд зам тээврийн осолд өртөх явдал ихэсч байгаа талаар цагдаагийн байгууллагаас анхааруулж байна. Иймээс эцэг эх, асран хамгаалагчид нь хүүхдэдээ тавих хараа хяналтаа сайжруулж, анхаарал болгоомжтой байхыг цагдаагийн газраас зөвлөж байна.

Э.Жаргалан

Post Views: 1,256