Энэ сарын 23-ны өдрөөс шатахууны үнэ дахин буурчээ

Ашигт малтмал, газрын тосны газраас шатахууны үнийн асуудлаар мэдээлэл хийж байна.

Дэлхийн зах зээл дээр газрын тосны үнэ буурсантай холбоотойгоор дөрөвдүгээр сарын 13-наас эхлэн шатахууны үнэ 150-230 төгрөгөөр буурсан.

Тэгвэл энэ сарын 23-ны өдрөөс шатахууны үнэ дахин буурчээ. А-80 автобензин 50 төгрөгөөр, АИ-92 автобензин 80-100 төгрөгөөр буурснаар А-80 автобензин 1350 төгрөг, А-92 автобензин 1360 төгрөгөөр худалдаалагдаж байна. Аи-95 автобензин 200 төгрөгөөр, дизель түлшний үнэ 180 төгрөгөөр буурчээ.

Сануулахад, энэ сарын 19-нд Шатахууны хангамж үнэ тарифыг тогтворжуулах, хяналт тавих Үндэсний зөвлөл хуралдсан. Зөвлөлийн хурлаар дараах шийдвэрүүдийг олонхийн саналаар дэмжин, зөвлөмж гаргасан юм.

1. Шатахууны хангамж, үнэ тарифыг бууруулах, тогтворжуулах талаар Дэлхийн зах зээл дээрх нефтийн үнийн бууралттай холбоотойгоор шатахууны үнийг энэ сараас дахин бууруулах /ингэхдээ 100 орчим төгрөгөөр бууруулах/, цаашид зургаан сарын хугацаанд дэлхийн зах зээл дээр үнэ нь өссөн ч жишиг үнийг тогтвортой барих

2. Мөн 2014 оноос хойш шатахууны жижиглэнгийн үнийн тооцооллын жишиг буюу аж ахуйн нэгж байгууллагуудын зардлын өртгийг цалин хөлс, валютын ханшийн өсөлт зэргийг харгалзан литр тутамд дунджаар тав хүртэл төгрөгөөр нэмэгдүүлэх асуудлыг шийдвэрлэсэн.

3. Шатахууны үнэ 300-400 төгрөгөөр буурсантай холбогдуулан мөн дахин бууруулах болж байгаа тул бусад шатахууны үнийг даган өссөн бараа бүтээгдэхүүн үйлчилгээний үнийг бууруулах ажлын хэсгийг байгуулан ажиллахаар болсон юм.

Post Views: 1,993