Австралийн Засгийн газрын тэтгэлэгт хөтөлбөрийг 5 жилээр сунгав

Өнөөдөр Сангийн сайд Ч.Хүрэлбаатар болон Австралийн Элчин сайд Жон Лантри нар Австралийн Засгийн газрын тэтгэлэгт хөтөлбөрийг тавн жилээр сунгах гэрээнд гарын үсэг зурлаа. Энэхүү арга хэмжээнд Австралийн Элчин сайдын яамны хөтөлбөр хариуцсан ажилтан Х.Өрнөх, мөн уг хөтөлбөрөөр суралцсан Сангийн яамны мэргэжилтнүүд байлцав.

Австралийн тэргүүний сургуулиудад суралцах боломжоор хангаж ирсэн энэ хөтөлбөр 1993 оноос хойш хэрэгжиж ирсэн. Өнөөдрийн байдлаар, менежмент, бизнес, хууль, төрийн захиргааны удирдлага, олон улсын харилцаа, мэдээллийн технологи зэрэг чиглэлээр мастерын сургалтад төр, хувийн хэвшлээс нийт 531 оюутан хамрагдаад байгаа аж.

Төгсөгчдийн ажил эрхлэлтийн түвшин 100 хувь ба үүнээс 22.5 хувь нь удирдах албан тушаалд ажиллаж байгаа нь хөтөлбөрийн үр дүнг илтгэж буй юм. Жендер ялгалгүй хамруулдаг төдийгүй 2013 оноос хойш хөдөө орон нутаг болон хөгжлийн бэрхшээлтэй иргэдээс хөтөлбөрт хамруулах болсон билээ. Энэ удаа магистраас гадна богино хугацаатай тэтгэлэгт сургалтууд зохион байгуулахаар гэрээнд нэмж оруулсан нь боловсон хүчин бэлтгэх, хөгжүүлэхэд чухал алхам  болов.