АТГ: С.Батболд шалгагдаж байгаа

Нийслэлийн засаг дарга бөгөөд Улаанбаатар хотын захирагч Су.Батболд "Макс" группын эзэн Д.Ганбаатарын газрын төлбөрөө төлөөгүйгээс эзэмших эрх нь цуцлагдсан 70 га газрыг буцаан олгохдоо авлига авсан байж болзошгүй баримтуудыг хуульч Г.Нацагдорж АТГ-т шалгуулахаар өгөөд байгаа. Энэ асуудлыг АТГ-аас тодруулахад “Уг асуудлыг шалгаж байна. Сарын бүрийн 25-нд хийдэг хэвлэлийн хурлаар илүү дэлгэрэнгүй мэдээлэл аваарай” гэсэн юм. Тэгвэл ирэх баасан гарагт буюу 9 дүгээр сарын 21-ний өдөр Нийслэлийн МАН-ын даргыг томилох юм. Энэхүү томилгоонд Су.Батболдын нэр яригдаж байгаа нь олон нийтийг бухимдуулаад байна. Учир нь түүний хувьд шалгагдаж байгаагаас гадна газрын наймаа, 60 тэрбумын хэрэгт нэр холбогдсон гээд олон асуудлыг ар араасаа дагуулсаар...  

Ямартаа ч түүний шалгуулах үндэслэлд юу, юу дурьдагдсаныг дор онцолж байна.

Хуучин улсын наадмын хурдан морины барианы газар байсан Яармагийн урд дэнжид морин тойруулга байгуулах зорилгоор 2000 онд 70 га газрыг Д.Ганбаатар авсан байдаг. Гэтэл олон жил төлбөр төлөөгүйн улмаас уг газрын зөвшөөрлийг 2015 онд цуцалсан байгаа юм. Харин Су.Батболдын 2018 оны А/726 тоот тушаалаар ХУД-ийн тавдугаар хороо, Яармагт байрлалтай дээрх 70 га газрын 54,1 га-г "Макс" Ганбаа-д ямар ч сонгон шалгаруулалтгүйгээр дахин олгосон байна.

Үлдсэн 15 га газраас 2,2 га газрыг өөрийн шадар туслах Э.Анарын нэр дээр, мөн 2,2 га-г Б.Оюун-Эрдэнэд олгосон байна. Эдгээр газар олголтуудыг нэг тушаалаар л шийдчихсэн нь авлига авсан байж болзошгүй гэх хардлага дагуулж байгаа юм. Э.Анар нь нийслэлийн засаг даргын шадар туслахаар ажилладаг, 25 настай төрийн албан хаагч. Тэрбээр Хан-Уул дүүргийн тавдугаар хороонд 2,2 га газар чухам ямар зориулалтаар хэрхэн авсныг шалгуулж байгаа юм.

Д.Дуулим