Үерт нэрвэгдэж орон гэргүй болсон айл өрхүүдэд сэтгэлийн илгээмж хүргэгдлээ

УИХ-ын гишүүн, Барилга, хот байгуулалтын сайд Х.Баделхан Баян-Өлгий аймгийн удирдлагуудын хамт Өлгий сумын ард иргэдтэй уулзалт хийж, УИХ-ын хаврын чуулганаас батлагдан гарсан хууль тогтоомж, Засгийн газар болон аймаг, орон нутгаас хэрэгжүүлж байгаа арга хэмжээ, бүтээн байгуулалт, цаашид хэрэгжүүлэхээр төлөвлөгдөж буй ажлуудын талаар мэдээлэл өгч, иргэдийн санал бодлыг сонсон, асуусан асуултанд хариулт өглөө.

УИХ-ын гишүүн, Засгийн газрын гишүүн, Барилга, хот байгуулалтын сайд Х.Баделхан хэлсэн үгэндээ: “Хаврын чуулганы хугацаанд УИХ-ын байнгын хороо болон дэд хороо 101 удаа хуралдаж, 304 асуудал, нэгдсэн чуулган 27 удаа хуралдаж 188 асуудал хэлэлцсэн. Чуулганаар бие даасан 17 хууль баталж, 67 хуульд нэмэлт өөрчлөлт оруулж, 51 тогтоол батлан гаргалаа. Мөн энэ удаагийн чуулганаар Тавантолгой төслийг эдийн засгийн эргэлтэд оруулах тогтоол, Оюутолгой төслийн хөрөнгө оруулалтын гэрээг шалгах ажлын хэсэг томилсон зэрэг шийдвэрүүдийг гарсан болохыг та бүхэнд дуулгаж байна. “Чингис” бондын 500 сая ам.долларын өрийг дарж, өрийн дарамтаас гарах боломж бүрдлээ. Эдийн засгийн байдал сайжирч 6.3 хувьд хүрлээ. Оны эцэс хүртэл 8 хувьд хүргэх зорилт тавьж ажиллаж байна” хэмээн онцоллоо.

Мөн энэ үеэр үерт нэрвэгдэж орон гэргүй болсон айл өрхүүдэд «МОНГОЛЫН БАРИЛГЫН ҮНДЭСНИЙ АССОЦИАЦИ»-ийн хамт олноос сэтгэлийн илгээмж болгон 11,3 сая төгрөг хандивласаныг ажлын хэсэгт хүлээлгэн өглөө.