“Эбола” вирусын халдварын шинэ тохиолдол Конгод бүртгэгджээ

 Бүгд Найрамдах Ардчилсан Конго Улсын баруун хэсгийн алслагдсан бүс нутагт дэгдсэн “Эбола” вирусын тархалтыг зогсоосон тухайгаа албан ёсоор мэдэгдсэнээс хэдхэн хоногийн дараа тус улсад уг вирусын халдварын шинэ тохиолдол бүртгэгдсэн тухай лхагва гарагт Дэлхийн эрүүл мэндийн байгууллагаас мэдээлэв.

Конго улсын засгийн газар Умард Киву мужид дээрх өвчний халдвар бүртгэгдсэн тухай лхагва гарагт зарласан бөгөөд долоо хоногийн өмнөхөн тус улсын эрүүл мэндийн яамнаас Экватеур мужид дэгдсэн тархалтыг бүрэн зогсоолоо хэмээн мэдэгдээд байсан юм. 

“Нийт 6 сорьцыг шинжлэхэд 4-өөс нь “Эбола” вирус илэрсэн гэж Киншаса хот дахь Био-анагаах ухааны судалгааны үндэсний хүрээлэнгээс мэдээлсэн” гэж тус улсын эрүүл мэндийн байгууллагаас мэдэгджээ. Мөн нэмэлт шинжилгээнүүдийг хийж байгаа юм байна.

Халдвар бүртгэгдээд байгаа Умард Киву мужид шилжин суурьшсан сая гаруй хүн амьдардаг бөгөөд  тус муж нь Руанда болон Уганда улсуудтай хил залгаа оршдог төдийгүй тэдгээр улстай хил дамнасан худалдаа наймаа эрхэлдэг ажээ. Дэлхийн эрүүл мэндийн байгууллага хөрш орнуудтай хамтран ажиллаж, эрүүл мэндийн байгууллагынхныг анхаарал болгоомжтой, хариу арга хэмжээ авахад бэлтгэлтэй байхыг сануулаад байгаа ажээ.

Эх сурвалж : Xinhua