НҮБ-ын цагдаагийн энхийг сахиулах ажиллагаанд Монголын дөрвөн алба хаагч үүрэг гүйцэтгэж байна

Өнөөдөр Олон улсын Энхийг сахиулагчдын өдөр

Цагдаагийн байгууллагаас 2006 оноос Сьерра Леон, Ирак, Чад, Афганистан, 2012 оноос БНӨСУ дахь НҮБ-ын энхийг сахиулах ажиллагааны 7 удаагийн ээлжинд Монгол Улсын Зэвсэгт хүчний мотобуудлагын батальоны бүрэлдэхүүнд цагдаа, дотоодын цэргийн байгууллагаас 330 орчим цэнхэр дуулгатан алба хаагч дэлхийн энх тайван, аюулгүй байдлыг хангах үйл хэрэгт оролцож Зэвсэгт хүчний цэргийн багт үүрэг гүйцэтгэж иржээ.

Энэ оны тавдугаар сарын байдлаар цагдаагийн байгууллагаас Өмнөд судан Улсад Нэгдсэн Үндэсний байгууллагын мандаттай Энхийг сахиулах ажиллагаанд үүрэг гүйцэтгэж байгаа Монгол Улсын Зэвсэгт хүчний VII ээлжийн мотобуудлагын батальоны бүрэлдэхүүнд 29, НҮБ-ын цагдаагийн энхийг сахиулах ажиллагаанд 3, нийт 32 алба хаагч үүрэг гүйцэтгэж байгаа юм.

Цагдаагийн ерөнхий газраас Монгол Улсаас НҮБ-ын дэргэд суугаа байнгын төлөөлөгчийн газарт “НҮБ-ийн цагдаагийн энхийг сахиулах ажиллагаанд алба хаагчийг томилон ажиллуулах” хүсэлтийг тавьж хамтран ажилласаны үр дүнд 2016 оны 03 дугаар сард цагдаагийн байгууллагаас сонгон шалгаруулалтад бэлтгэх сургалтыг анх удаа бие даан 56 алба хаагчийн хамруулан зохион байгуулан, сонгон шалгаруулалтад хамруулж, 14 алба хаагч тэнцсэнээс одоогийн байдлаар НҮБ-ын цагдаагийн энхийг сахиулах ажиллагаанд 4 алба хаагч үүрэг гүйцэтгэж байна гэж Цагдаагийн ерөнхий газраас мэдээллээ.