“ЗАЛУУСТ ЭЭЛТЭЙ АЖ ҮЙЛДВЭРИЙН ХУВЬСАЛ” ӨДӨРЛӨГ ЗОХИОН БАЙГУУЛАГДЛАА

Тус арга хэмжээг Хөдөлмөр, нийгмийн хамгааллын яам, Хүнс, хөдөө аж ахуй, хөнгөн үйлдвэрийн яам, Монголын үйлдвэрчний эвлэлийн холбоо, Монголын хөнгөн үйлдвэрийн ажилтны ҮЭ-ийн холбоо, Оёдлын салбарын нэгдсэн мэргэжлийн холбоо, Монголын ноос ноолуурын холбоо, Арьс ширний үйлдвэрлэлийн холбоо, Ноосон бүтээгдэхүүн эрхлэгчдийн холбоо, Монголын хэвлэлийн үйлдвэрүүдийн холбоо, Ой модны үйлдвэрлэл эрхлэгчдийн холбоо, Монголын гоо сайхны бүтээгдэхүүний кластер зэрэг байгууллагууд хамтран зохион байгуулав. Үйл ажиллагааг Хөдөлмөр, нийгмийн хамгааллын дэд сайд С.Зулпхар, Хүнс, хөдөө аж ахуй, хөнгөн үйлдвэрийн дэд сайд С.Ганхүлэг, Монголын үйлдвэрчний эвлэлийн холбооны ерөнхийлөгч С.Эрдэнэбат нар нээж, хөдөлмөрийн зах зээл дэх аж үйлдвэрийн салбарын өнөөгийн байдал болон төрөөс энэ салбарт баримталж буй бодлого, үйл ажилагааны талаар мэдээлэл хүргэлээ.

Арга хэмжээний хүрээнд хөнгөн үйлдвэрийн салбарыг залуучууд, олон нийтэд сурталчлан таниулах, залууст ээлтэй эерэг байгууллагын соёл, сайн туршлагыг түгээн дэлгэрүүлэх, ажилд зуучлах, ерөнхий боловсролын сургууль төгсөгчдийн мэргэжил сонголтод дэмжлэг үзүүлэх, мэргэжлийн сургалтын байгууллагууд болон тэтгэлэгт хөтөлбөрүүдэд зуучлах, салбарын ололт амжилтыг олон нийтэд сурталчлах зэрэг зорилтыг дэвшүүлэн үйл ажиллагааг хэрэгжүүлснээрээ онцлог болов.

Өдөрлөгт нийт 40 гаруй ажил олгогч байгууллага болон 10 их, дээд сургууль, МСҮТ, тэдгээрт суралцаж буй 500 гаруй залуучууд, 500 гаруй ажил хайгч иргэн оролцлоо.

Нийслэлийн Хөдөлмөр, халамжийн газар тус арга хэмжээнд Нийслэлийн Хөдөлмөр, Халамжийн газар болон дүүргийн Хөдөлмөр, халамжийн үйлчилгээний хэлтсүүд оролцож, иргэд, олон нийтэд 2023 онд хэрэгжүүлж буй хөдөлмөр эрхлэлтийг дэмжих үйл ажиллагааг сурталчлан хөдөлмөр эрхлэлтийн нийтлэг үйлчилгээг нэг дороос хүргэж ажиллав. Өдөрлөгөөр 1300 гаруй ажлын байрны захиалгыг танилцуулж, 280 иргэнд зөвлөгөө, мэдээлэл өгсөн ба 200 орчим ажил хайгч иргэнийг бүртгэж, 135 иргэнд ажлын байр санал болгосноос 30 иргэн ажилд зуучлагдан орлоо.