М.БИЛЭГТ: ХӨГЖЛИЙН БАНКНААС ТӨГРӨГӨӨР ЗЭЭЛ АВЪЯ ГЭЖ "ШАНТААЖЛАХ"-ЫГ ХҮСЭЭГҮЙ

Хөгжийн банкнаас олгосон зээлийн өр төлбөрийг барагдуулах зарим арга хэмжээний тухай Засгийн газрын тогтоолын хэрэгжилтийг эрчимжүүлэх үүднээс Нотлох баримтыг шинжлэн судлах сонсгол хоёр дахь өдрөө Төрийн ордноо үргэлжилж байна.

Монгол Улсын Засгийн газар, Сангийн яам болон төрийн холбогдох байгууллагуудтай хамтран чанаргүй зээлийг эргэн төлүүлэх ажлыг үе шаттай хэрэгжүүлсээр байгаа. Товчхондоо, Хөгжлийн банкнаас гарсан зээлүүдийн эргэн төлөлтөд анхаарсны үр дүнд өдгөө 994.7 тэрбум төгрөгийн зээл эргэн төлүүлээд байна.

Яг одоо сонсголоор “Ачлал Трейд” ХХК-ийн зээлийн асуудлыг хэлэлцэж байна.

Тус компани нь 2017 онд Хөгжлийн банкнаас “Эмнэлгийн барилгын цогцолбор байгуулах төсөл”-ийн хүрээнд 15 сая ам.долларын зээлийг авчээ. Эл компанийн 50 хувийг УИХ-ын гишүүн асан М.Билэгт эзэмшдэг бөгөөд өнөөдрийн сонсголд гэрчээр оролцож байна.

Энэ үеэр тэрбээр “Хэрэв би өөрийнхөө албан тушаал, эрх мэдлээ ашиглая гэж бодсон бол нэгдүгээрт, би төгрөгийн зээл авна. Хоёрдугаарт, илүү урт хугацаатай авна.

Гуравдугаарт, хүүг нь бага авна. Гэтэл би тэгээгүй. Тухайн үед Хөгжлийн банк гадны эх үүсвэртэй ямар, зээл, хэр хэмжээгээр олгох боломжтой байсан яг түүгээр нь л явсан. Мөн өнөөдөр Хөгжлийн банкнаас зээл авснаараа буруутаагүй. Улс оронд хэрэгтэй тэр эмнэлгийн барилгыг би биш ч хэн нэгэн ашиглаад л явна. Би Хөгжлийн банкнаас 37 тэрбумын зээл авч байсан бол өнөөдөр 75 тэрбум болгоод 8 тэрбумыг нь төлчихсөн явж байна. Энэ төсөлд 45 доллар буюу 165 тэрбумыг зарцуулчихсан. Эндээ 66.7 тэрбум нь Хөгжлийн банкны зээл болоод л явна” гэв.

Хянан шалгах түр хорооны дарга Б.Энхбаяр “Та төгрөгөөр зээл авах байсан гэж хэлж байна. Гэтэл тухайн үеийн Хөгжлийн банкны хүмүүс танай компанийг өөрсдөө доллараар зээл авъя гэдэг хүсэлт тавьсан гэж байгаа. Энэ дээр тайлбар байна уу” гэв.

Үүнд, УИХ-ын гишүүн асан М.Билэгт “Би өөрийнхөө итгэл үнэмшлээр явсан. Яагаад гэвэл 2015 онд Засгийн газарт хандаж байхдаа, энэхүү төсөлд нийтдээ 60 сая доллар орох юм. Үүнийг судалж үзээч ээ гэдэг хүсэлтийг гаргасан. Гэтэл Хөгжлийн банкны эх үүсвэр нь өөрөө доллар. Мэдээж тэндээс төгрөгөөр зээл авъя гэж ёсзүйгүй хандаж болохгүй л гэж бодсон. Нэг ёсондоо төгрөг гэдэг санал оруулж шантаажлахыг бодоогүй” гэдэг хариултыг өглөө.

Post Views: 471