"ШАРЫН ГОЛ" ХК-ИЙН ТУЗ-ИЙН ДАРГА, ТЕГ-ИЙН ДАРГА АСАН Д.ГЭРЭЛИЙН ОХИН Г.ХУЛАН ТАЙЛБАР ӨГНӨ ҮҮ!

Хөгжлийн банкны өнөөдрийн сонсгол “Империал Гоулд Майнинг“ ХХК, “Шарын гол” ХК-ийн зээлтэй холбоотой асуудлыг хэлэлцэж, шинжээч мэдээлэл өгч дууслаа.

“Шарын гол” ХК-ийн зүгээс зээлийг бүрэн төлж барагдуулсан хэдий ч зээлийн зарцуулалт мөнгө угаалтын шинжтэй ноцтой байдал үүсгээд байгаа юм.

Зээлийн зарцуулалт хэрхэн явагдсан талаар шинжээчийн өгсөн мэдээллээр “Шарын гол” ХК зээлийн санхүүжилтээс 4.0 тэрбум төгрөгийг “Хэрлэн онон туул” ББСБ-д шилжүүлж, зориулалтын бусаар зарцуулжээ.

Банк бус байгууллага руу Хөгжлийн банкны зээлийн эх үүсвэр ороод явж байгаа нь мөнгө угаалтын түгээмэл шинж юм. Гэтэл Хөгжлийн банкнаас Шарын гол ХХК руу гарсан зээлээс 4 тэрбум төгрөг энэхүү банк бус санхүүгийн байгууллага руу гарсан талаар асууж, тодруулах гурван нэр бүхий албан тушаалтнууд гурвуулаа өнөөдрийн сонсголд ирээгүй байна.

“Шарын гол” ХК-ийн ТУЗ-ийн дарга Г.Хулан нь гадаадад явж байна гэдэг шалтгаанаар ирсэнгүй. Түүнийг ТЕГ-ын дарга асан Д.Гэрэлийн охин гэдгээр нь олон нийт андахгүй.

Мөн дээрх нэр дурьдагдсан банк бус байгууллагын хувьцаа эзэмшигч Б.Батбаатар гэгч, өдгөө “Шарын гол” ХХК-ийн ТУЗ-ийн гишүүн хийдэг. Гэтэл энэхүү сонсголд гэрчээр дуудах эрх бүхий алба хаагч биш гэж өөрийгөө нэрлээд, сонсголд ирсэнгүй.

“Шарын гол” ХК-ийн ТУЗ-ийн гуравдахь гишүүн Ж.Эрдэнэбилэгийн тухайд ч Хөгжлийн банкны зээлийн зарцуулалттай өөрийн эзэмшлийн компаниараа холбогдож байгаа хэрнээ өнөөдрийн сонсголд ирсэнгүй гэдгийг онцлон хэлэх нь зүйтэй биз ээ.

Post Views: 800