ЧЭЖҮ МУЖИЙН ИТХ-ЫН ДАРГА КИМ КЁН ХАК ТЭРГҮҮТЭЙ ТӨЛӨӨЛӨГЧДИЙГ ХҮЛЭЭН АВЧ УУЛЗЛАА

Нийслэлийн ИТХ-ын дарга Ж.Батбаясгалан манай улсад ажлын айлчлал хийж буй БНСУ-ын Чэжү мужийн Иргэдийн Төлөөлөгчдийн Хурлын дарга Ким Кён Хак тэргүүтэй төлөөлөгчдийг өнөөдөр хүлээн авч уулзлаа. Уулзалтын эхэнд Нийслэлийн иргэдийн Төлөөлөгчдийн Хурлын дарга Ж.Батбаясгалан БНСУ-ын тусгай бүс Чэжү мужийн нутгийн өөрөө удирдах ёсны байгууллагын удирдлагууд Улаанбаатарт айлчилж буйг нь онцлоод, Монгол дахь ажлын айлчлалд нь амжилт хүслээ. Тэрбээр “Саяхан Монгол Улсад БНСУ-ын Гадаад хэргийн сайд айлчилсан. Ажил хэрэгч, найрсаг уур амьгалд үр дүнтэй хэлэлцээ хийж, дээд түвшинд тохиролцсон Монгол Улс, БНСУ-ын Стратегийн түншлэл иж бүрнээр хэрэгжихэд хотууд, муж, бүс нутаг, хоёр орны ард түмний харилцаа мөн чухал. Монголд Солонгосын урлаг, хоол хүнс, ахуй соёл болон бараа бүтээгдэхүүн сайн нэвтэрсэн. Харин Монгол орныг таниулан сурталчлах, ахуй соёлын талаар түгээн дэлгэрүүлэхэд хамтран ажиллах саналтай байна” гэлээ. 

Харин Чэжү мужийн Иргэдийн Төлөөлөгчдийн Хурлын дарга Ким Кён Хак “Чэжү арал аялал жуулчлал төдийгүй урлаг, спортын салбар өндөр хөгжсөн бүс нутаг. Өнөөдрийн бидний уулзалт Улаанбаатар хот-Чэжү мужийг олон салбарт харилцан үр дүнтэй хамтран ажиллах харилцааны эхлэл болно гэдэгт итгэлтэй байна” гэсэн юм.