Б.ХУЯГБААТАР: ОЛИМПИАД БАГШ, СУРАГЧДЫН ЧАДВАР, ЧАДАМЖИЙГ НЭМЭГДҮҮЛСЭН

"Дэлхийд өрсөлдөх Сонгинохайрханчууд-2022" англи хэлний олимпиад - 6 дахь жилдээ амжилттай зохион байгуулагдаж өндөрлөлөө.  Тус олимпиадад дүүргийн ерөнхий боловсролын 24 ахлах сургуулийн 2050 сурагч, багш нар нэг сарын хугацаанд тест, эссэ бичлэг, илтгэл гэсэн 3 үе шаттай өрсөлдөж өнөөдөр дүнгээ гарган, шилдгүүдээ тодруулж шилдэг 3 багш, 5 сурагч “Сингапур улсад суралцах”, шилдэг 55 сурагч Absolute англи хэлний сургалтын төвд тэтгэлэгтэйгээр суралцах эрхийн бичгийг тус тус гардан авлаа.

Энэ үеэр СХД-ийн Иргэдийн Төлөөлөгчдий хурлын дарга Б.Хуягбаатар “Сонгинохайрхан дүүргийн хүүхэд, залуучууд дэлхийд өрсөлдөх хэмжээнд бэлтгэгдэж, дэлхий нийтийн хэл болох англи хэлийг маш сайн эзэмшиж байгаа. Энэ хөтөлбөр зарлагдсанаас хойш хүүхдүүд идэвхжиж, сурч хөгжихийн төлөө чадвараараа өөр хоорондоо өрсөлдөх болсон. Хүүхдүүдээ хөтөлбөрт хамруулах гэсэн багш, сургуулиуд нэмэгдсэн. Энэ хэрээрээ сурагч, багш нарын чадвар мэдлэг, чадамж дээшилж байгаа гэж харж байна. Цаашид дүүрэг, орон нутгийн зүгээс дэмжиж, санаачилга гаргаж ажиллана” хэмээв.

“Өөрийгөө сорьж, өөртөө боломж нээе” гэсэн эрмэлзэлтэй хүүхдүүдэд маш хэрэгтэй хөтөлбөр болсон талаар оролцогч хүүхдүүд онцолж байна.