ХҮНСНИЙ ЭРХИЙН БИЧГИЙН ҮЙЛЧИЛГЭЭНД ХАМРАГДДАГ 100 ИРГЭНИЙГ АЖЛЫН БАЙРААР ХАНГАХ САНАМЖ БИЧИГ БАЙГУУЛЛАА

Сонгинохайрхан дүүргийн Засаг даргын тамгын газар, дүүргийн Иргэдийн Төлөөлөгчдийн хурлаас  “ХАМТДАА ХӨДӨЛМӨРЛӨЕ, ХАМТДАА ХӨГЖЬЕ” нэгдсэн өдөрлөг зохион байгууллаа.  Энэ үеэр хамгийн олон ажлын байр бий болгосон аж ахуй нэгжид “Батламж” гардууллаа. Мөн зорилтот бүлгийн иргэнийг ажлын байраар хангаж буй ажил олгогчтой дэмжлэгийн “ГЭРЭЭ” байгуулсан оцгой үйл явдал тохиолоо.

Энэхүү өдөрлөг нь Монгол Улсын Засгийн газраас хэрэгжүүлж буй бодлого шийдвэр, Нийслэл, дүүргийн Засаг даргын мөрийн хөтөлбөрийн хэрэгжилтийг хангах,, иргэдэд мэдээлэл зөвлөгөө өгөх, ажилгүй иргэдийг ажлын байранд зуучлах, Хөдөлмөр эрхлэлтийн Үндэсний зөвлөлөөс 2022 онд хэрэгжүүлэхээр баталсан хөдөлмөр эрхлэлтийг дэмжих үйл ажиллагаа, төсөл хөтөлбөрийг хэрэгжүүлэх, нийгмийн халамжийн олон талт үйлчилгээг иргэдэд нэг цэгээс хүргэх зорилгын хүрээнд зохион байгуулагдлаа.

Өдөрлөгийн үеэр өрхийн үйлдвэрлэл эрхлэгчдийн бараа бүтээгдэхүүнийг сурталчлан борлуулалтыг дэмжих, хувиараа хөдөлмөр эрхлэгч, ажил олгогч байгууллагуудыг хөдөлмөрийн зах зээлийн мэдээ, мэдээллээр хангах үйлчилгээг үзүүлжээ.