Соёлын сайдаар Б.Батцэцэгийн нэр яригдаж байна

У.Хүрэлсүх ёс зүйн хариуцлага хүлээж Ерөнхий сайдаас огцрох хүсэлтийг УИХ-аар баталсантай холбоотойгоор түүний танхмын гишүүд ч мөн үргэлжлүүлэн ажиллах боломжгүй болсон. Гэхдээ танхимын гишүүдээс нэр бүхий хэдэн сайд үлдэх байх гэсэн яриа байгаа юм. Харин иргэд, олон нийт дараагийн Ерөнхий сайдад дэмжигдээд буй Л.Оюун-Эрдэнэий баг хамт олны талаар таамаг дэвшүүлэх болов. Энэ таамагт хэд хэдэн эмэгтэйчүүд яригдаж байгаагаас Соёлын сайдаар Гадаад харилцааны дэд сайд асан Б.Батцэцэгийн нэр яригдаж эхэллээ.

Б.Батцэцэг нь МУИС-ийн Олон улсын харилцааны дээд сургуулийг 1996 онд, Санхүү, эдийн засгийн дээд сургуулийг 2000 онд, Голландын Маастрихтийн менежментийн их сургуулийг 2005 онд тус тус дүүргэсэн, англи, орос хэлтэй.

1996-2005 онд “Мөнхийн Үсэг” ХХК-ийн захирал, 2005-2007 онд Гадаадын хөрөнгө оруулалт, гадаад худалдааны агентлагт хэлтсийн дарга, 2007-2015 онд “Мөнхийн үсэг групп” ХХК-ийн УЗ-ийн дарга, 2010-2011 онд МАХН-ын ажлын албанд зөвлөх, 2011-2012 онд МАН-ын ажлын албанд Гадаад харилцаа, хамтын ажиллагааны хэлтсийн дарга, 2015-2016 онд Сангийн сайдын зөвлөх, улмаар Гадаад харилцааны Дэд сайдаар тус тус ажиллаж байжээ.