В.Путиныг хэн сайн дуурайх вэ? уралдаанд У.Хүрэлсүх түрүүлэх нь

Монголчуудад орос школ байдаг гэж л сонсож байснаас орос хүнтэй төстэй гэж сонсож байсан нь ховорхон санагдана. Гэтэл манай томчуудын дунд В.Путин стайл дэлгэрээд эхэллээ. Үүнийг анзаарсан зарим хүн хүний царай зүс, эдлэл хэрэглэл, пи ар маркетинг дуурайх яах вэ. Ажлын арга барил, улс орондоо хэрэгжүүлж буй зөв зүйтэй зүйлийг нь дуурай гээд хэлчихмээр санагдаж байгаа байх.

Ерөнхийлөгч, Ерөнхий сайд, Хотын даргаас нь эхлээд төрийн өндөр хэргэм зэрэгтнүүд нь бусдыг дуурайж, ижилсхээр ичгэвтэр ч юм шиг. Ерөнхийлөгч Х.Баттулга, Ерөнхий сайд У.Хүрэлсүх, Хотын дарга С.Амарсайхан нар “Түүнийг хэн сайн дуурайх вэ” тэмцээнд оролцохоор тохирсон гэлтэй байсхийгээд л В.Путин стайл гаргаад явчих төлөвтэй шүү.

Одоо бараг ард түмэн Ерөнхийлөгч Х.Баттулга сайн дуурайсан, У.Хүрэлсүх тааруухан гэж мэтгэлцэх юмуу хаашаа ч юм.

 Станфордын их сургуулийн сэтгэл судлалын профессор Албэрт Бандура-н хүний зан ааш генээр удамшдаг биш, эргэн тойрныхоо хүмүүсийн хийж буй үйлдлийг даган дуурайх замаар бүрэлддэг гэдгийг харуулах судалгаа, туршилтыг хийж байжээ. Товчхондоо тухайн судалгаагаар бидний хэлдгээр хүчирхийлэл хүчирхийлэгчийг бий болгодог гэдэг шиг ууртай дээрэлхүү нэгнийг харж өссөн хүүхэд уур ууцаартай нэгэн болж хувирахад, найрсаг эелдэг нэгнийг харж өссөн хүүхэд илүү эелдэг нэгэн болж төлөвших хандлагатай байдгийг нотолж.

Хэрэв ийм бол манай томчууд В.Путиныг дуурайснаар хэрхэн яаж өөрчлөгдөхийг цаг хугацаа бидэнд тун удахгүй харуулаад өгөх нь ээ. Хүүхэд л дуурайдаг гэдгийг хамгийн төгс няцааж өгсөн хүмүүсээр тэднийг мөн нэрлэе.