О.Баасанхүү зодуулж, эмнэлэгт хүргэгджээ

Өнөөдөр  Улсын дээд шүүх хуралдаж, МАХН-ын дүрмийн өөрчлөлтийг бүртгэсэнгүй. Мөн шүүх хурлын дараа  УИХ-ын гишүүн О.Баасанхүү, МАХН-ын дэд дарга Э.Эрдэнэжамъян нар хоорондоо муудалцаж, багагүй асуудал дэгдээжээ. Энэ үеэр МАХН-ын гишүүн Уламбаяр гэх залуу УИХ-ын гишүүн О.Баасанхүүгийн биед халдаж, ноцтой гэмтэл учруулсан байна. Яг одоогоор УИХ-ын гишүүн О.Баасанхүүгийн биеийн байдал муу, эмнэлэгт хүргэгдээд байгаа талаар эх сурвалж мэдээллээ.

Шүүх хурлын талаарх дэлгэрэнгүй:

МАХН-ын дүрэм, мөрийн хөтөлбөрт оруулсан өөрчлөлтийг бүртгүүлэх тухай Н.Энхбаяр нарын хүсэлтийг Улсын Дээд шүүх 2018 оны 5 дугаар сарын 14-ний өдөр  хэлэлцлээ.

Улсын Дээд шүүх МАХН-ын дүрэм, мөрийн хөтөлбөрт оруулсан өөрчлөлтийг бүртгүүлэх Н.Энхбаяр нарын хүсэлтийг 2018 оны 3 дугаар сарын 12-ны өдөр хэлэлцээд 07 тоот тогтоолоор хүсэлтийг хангахаас татгалзахдаа намын ээлжит II Их чуулганыг Улс төрийн намын тухай хууль болон намын дүрэмд нийцүүлэн хуралдуулсан гэж үзэх үндэслэлгүй хэмээн  дүгнэжээ.

Улсын Дээд шүүхийн дээрх тогтоол хүчин төгөлдөр байгаа, МАХН-аас шинээр ирүүлсэн баримтууд нь уг тогтоолд заасан үндэслэлийг  арилгаагүй байх  тул   хүсэлтийг хүлээн авахаас татгалзаж шийдвэрлэв.

М.Эрдэнэ