М.Тэлмэн: Амжилтын түлхүүр болсон ээж, аавынхаа ачийг хариулна даа

Монгол Улсынхаа нэрийг дэлхийн тавцанд гаргасан балетчин М.Тэлмэн өнөөдөр /2019.06.12/ эх орондоо ирлээ. Түүний хувьд “Монголын ард түмэн маань олон сайхан урмын үг хайрлаж, амжилт хүсэж байгаад туйлын их баяртай байна. Дэлхийн аугаа тайзнаа эх орон, ээж, аавыгаа хамгаас их бодож байлаа. Хүү нь та нарынхаа ачийг хариулна аа. Мөн намайг дэмжиж, надад урам хайрлаж байгаа бүх хүмүүсийн итгэлийг алдахгүй цаашид улам  илүү хичээх болно” хэмээлээ.  Тэрбээр АНУ-ын Нью-Йорк хотноо болсон дэлхийн 10 улсын 18 хотод зохион байгуулагддаг, ЮНЕСКО-д бүртгэлтэй, чансаа өндөр “World Ballet Grand Prix” тэмцээнд анх удаа түрүүлсэн монгол хүү гэдгээрээ олон түмэнд танигдаад байна.

М.Тэлмэн нэр хүндтэй тэмцээнээс алтан медаль хүртэхээс гадна 60 мянган ам.долларын тэтгэлгийн эзэн болсон билээ.  Уг олон улсын тэмцээний шалгаруулалтад 1800 гаруй бүжигчид өрсөлдөж, түүхэнд монгол хүн анх удаагаа алтан медаль авч байгаагаараа онцлог юм. Балетчин М.Тэлмэн анх 10 настайдаа Монгол Улсын консерваторид суралцаж, 2017 онд төгсчээ. Сургуулиа төгсөөд дэлхийн балетын од У.Бат-Эрдэнэ багштайгаа холбогдож бэлтгэл сургуулилт хийснээр ийнхүү дэлхийн хэмжээний нэр хүндтэй шагналыг өвөртлөөд эх орондоо ирлээ