Н.Цэрэнбатыг шонхорын асуудлаар шахаанд орсон гэв

Сүүлийн үед салбарын яамнаас үндэсний бахархалт шонхор шувууг гадагшаа олон тооноор нууцаар гаргасан гэх мэдээлэл гарч эхэлсэн. Мөн Байнгын хорооны хуралдаан дээр Ж.Энхбаяр Засгийн газрын нууц тогтоолоор 750 шонхор шувууг зарсан байна гэх мэдээллийг хийсэн билээ. Тэгвэл энэ асуудалд БОАЖЯ-ны сайд Н.Цэрэнбат тайлбар хийхдээ  “Миний бие шонхор шувуутай холбоотой ямар ч асуудлыг Засгийн газрын хуралдаанд оруулаагүй. Мөн Засгийн газрын хуралдаанаар шонхор шувуутай холбоотой ямар нэг асуудал огт хэлэлцээгүй гэдгийг албан ёсоор мэдэгдэж байна. Өмнө нь 2011 оныг хүртэл идлэг шонхор шувууг арилжааны шугамаар гадагш нь гаргадаг байсан. 2013 оны Н.Алтанхуягийн Засгийн газрын тогтоолоор идлэг шонхор шувууг арилжааны шугамаар гаргахыг хориглосон тогтоол өнөөдрийг хүртэл хүчин төгөлдөг үйлчилж байгаа. Энэ тоог яаж гаргаад байгааг мэдэхгүй байна. Ж.Энхбаяр гишүүн энэ тооныхоо задаргааг өөрөө хэлэх байх. Миний бие Засгийн газрын гишүүнээр томилогдсоноосоо хойш өнөөдрийг хүртэл шонхор шувууны асуудлыг Засгийн газрын хуралдаанд оруулаагүй гэдгийг дахин хэлье” гэсэн юм.

Тэгвэл  Монголын мэргэжлийн анчдын холбооны тэргүүн Д.Хурцгэрэл “Би Байгаль орчны иргэний  зөвлөлийн гишүүн байхдаа БОАЖЯ-ны сайд Н.Цэрэнбаттай олон удаа уулзаж ангийн тухай асуудлыг зөв болгоё гэж ярилцлсан. Тэр дундаа шонхорын наймааны асуудлыг хөндөж тавьсан юм. Тэрээр ч арай хэтэрчихсэн зүйл байна лээ гэж саналаа хэлж байсан. Гэвч одоо шахаанд орчихсон явж байна. Шонхор шувуу бол Юнеско, Дэлхийн өвд бүртгүүлсэн амьтан. Гэтэл түүнийг хамгаалах, түүх соёлоо сэргээх асуудал нэн хурцадмал болчихлоо. 2023 онд энэ асуудлаар тайлангаа тавина. Энэ дээр жишээ нь юу ярьж хэлэх гэж байгаа хүмүүс юм бүү мэд. Дандаа худалдсан, нууц тогтоолоор хуйвалдсан, бэлэглэсэн гээд яриад сууж байх юм уу” хэмээн байр сууриа илэрхийллээ.