Зочид буудлын өрөөнд 14 настай охин согтуурсан үедээ өөрийгөө зүсэж гэмтээжээ

Арванхоёрдугаар сарын 31-ны өдөр Баянгол дүүргийн нутаг дэвсгэрт үйл ажиллагаа явуулдаг нэгэн зочид буудлын өрөөнд 14 настай охин согтууруулах ундааны зүйл хэтрүүлэн хэрэглэсэн үедээ өөрийнхөө гарын бугуйн хэсгийг гурван удаа зүсэж гэмтээжээ. Хэргийн талаарх дуудлага мэдээллийн дагуу цагдаагийн алба хаагчид очиж шалгахад Дундговь аймгийн харъяат Х гэх 14 настай охин өөрийгөө хутгаар гэмтээж байсныг таслан зогсоож, Эрүүлжүүлэх арга хэмжээ авсан байна.

СЭРЭМЖЛҮҮЛЭГ: Зочид буудлын өрөөнд гэмт хэрэг зөрчил гарсаар байгааг мэргэжлийн байгууллагийнхан анхааруулсаар байгаа юм. Өнгөрөгч оны наймдугаар сард “Очир” төвийн буудлын өрөөнд 13 настай охиныг онц хэрцгийгээр хөнөөсөн хэрэг гарч олныг цочирдуулсан билээ. Хэрэг гарсан өдрөөс хойш зочид буудлуудад насанд хүрээгүй иргэнд үйлчлүүлэхгүй байхыг онцгойлон анхааруулж байсан. Харин энэхүү хуулийн заалт хэрэгжихгүй байгаа юм. Зочид буудлын өрөөнд архидан согтуурч гэмт хэрэг үйлдэх, гэмт хэргийн золиос болох, амь нас, эрүүл мэндээрээ хохирсоор байгааг цагдаагийн байгууллагаас анхааруулж байна.

У.УРАНЦЭЦЭГ

Эх сурвалж: MEDEE.MN